Hende ku a pèrdè trabou (for di 15 di mart)

Ken ta bini na remarke pa e kompensashon pa persona ku a pèrdè empleo?

E kompensashon pa persona ku a pèrdè empleo ta destiná pa personanan ku, debí na e medidanan obligatorio relatá na COVID-19, a pèrdè nan trabou después di e fecha 15 di Mart 2020.

E kompensashon aki tambe ta destiná pa personanan ku parsialmente a pèrdè empleo. Ku esaki ta referí na: un bahada di minimalmente mitar di bo oranan di trabou i e sueldo pa e oranan aki.

Kiko e kompensashon pa persona ku a pèrdè empleo ta enserá?

E kompensashon ta enserá un máksimo di 60% di e sueldo mínimo (ANG 1.000,- pa luna), pero sin subi e promedio di bo entrada di e ùltimo dos lunanan. SOAW lo realisá e pago di e kompensashon kada luna, retroaktivo for di 15 di Mart 2020.

E periodo durante kua lo risibí e kompensashon ta 1 luna.

Por ekstendé e periodo di kompensashon si esaki ta nesesario na momentu ku e situashon di emergensia, kousá pa COVID-19, sigui pèrdurá.

Kua dokumentu bo tin mester pa por yena e petishon?

1. Un Sédula válido
2. Number di sédula
3. Un kuenta di banko riba bo nòmber
4. Adrès di bo banko
5. Bo number di CRIB personal (preferénsha)
6. Nòmber i adrès di e kompania kaminda bo tabata traha
7. Bo ùltimo 2 slipnan di salario
8. Bo karta di retiro
9. Diploma òf sertifikado (preferénsha)
10. Curriculum Vitae (si bo tin esaki)

Kon e proseso pa entregá un petishon pa e kompensashon pa persona ku a pèrdè empleo lo kana?

1. Bo ta yena e petishon, i si bo mester di yudansa, bo por risibí sosten pa medio di un chatline;
2. Na momentu ku esaki ta nesesario lo pidí bo pa bo ofresé mas informashon;
3. Bo ta risibí un informe den kua lo indiká si bo petishon ta aprobá òf rechasá;
4. Ministerio di Desaroyo Sosial, Labor i Bienestar (SOAW) lo ehekutá e pago di e kompensashon, dor di depositá e kompensashon riba bo kuenta di banko.

Ki mi mester ta prepará pa hasi na momentu ku mi kuminsa risibí e kompensashon pa persona ku a pèrdè empleo?

E persona ku a pèrdè trabou mester ta disponibel inmediatamente pa trabou pagá i/òf ta dispuesto na partisipá na rekapasitashon òf trayektonan di enseñansa. Na momentu ku esaki ta posibel, e persona ku a pèrdè empleo mester kuminsa buska un trabou aktivamente. Mientrastantu e persona ku a pèrdè empleo mester ta dispuesto na hasi trabou boluntario òf sigui enseñansa, i si ta nesesario ehersé esaki for di kas.

Ki ora mi ta risibí mi kompensashon?

Ounke bo a yena e aplikashon por kompletu, esaki aun no ta nifiká ku bo ta bini na remarke pa sosten temporal. Ministerio di Desaroyo Sosial, Labor i Bienestar (SOAW) lo evaluá bo datonan i tuma un desishon riba e petishon. Ta posibel ku lo pidí bo pa ofresé mas informashon. SOAW lo purba na informá bo tokante e desishon final denter di 2 siman.