Empresanan (gastunan operashonal fiho)

Kua empresanan por bini na remarke

Empresanan ku por bini na remarke pa e areglo di gastunan operashonal fiho ta lo siguiente. Empresanan:

• ku tin trahadó inskribí na SVB banda di e direktor statutario. Tambe empresa individual (“eenmanszaak”) ku mas trahadó den su servisio ku no ta solamente e doño di e empresa;
• ku ta kai bou di e lista di sektornan ku a wòrdu identifiká i aprobá den e areglo di NOW;
• Empresa ekonómikamente aktivo ku ta inskribí na SVB promé ku 28 di febrüari 2020 ku ta konosí serka Inspekshon di Impuesto i/òf Ontvanger;
• Empresa ku tin un promedio di pèrdida di entrada di mas ku 25% di e periodo di òktober, novèmber i desèmber 2020 kompará ku mesun lunanan di 2019 debí na e krísis di COVID-19 òf medidanan tumá dor di Gobièrnu pa por kombatí e krísis di COVID-19.

Empresanan ku a base di e lista di sektornan den areglo di NOW por a bini na remarke pero a keda desaprobá dor di SVB òf SBAB pa e areglo di NOW no ta bini na remarke tampoko pa e areglo di gastunan operashonal fiho (TVL).

Empresanan di Gobièrnu (tur empresa kaminda tin representashon di Gobièrnu den e bestür ku mas ku 50% di akshon òf fundashonnan ku ta risibí mas ku 50% di nan entrada dor di supsidio di Gobièrnu) i empresanan individual (“eenmanszaak”) sin personal i empresa ku ta den fase di bai fayit òf a haña eksonerashon di Korte pa no bai fayit no ta bini na remarke.
Tur “vennootschap” òf fundashon (stichting) ku ta kumpli ku e kondishonnan ariba menshoná por apliká i bini na remarke pa e areglo.

Montante di sosten pa gastunan operashonal fiho

1. Diferensia di entrada di kuater kuartal (Q4) di 2020 ku ta e lunanan di òktober, novèmber i desèmber kompará ku mesun periodo di 2019. E promedio di porsentahe di pèrdida di entrada pa kuartal mester ta mínimo 25% pa por bini na remarke.
2. Promedio di porsentahe di gastunan operashonal fiho di entrada di empresanan establesé na Kòrsou lo ta 32%. E porsentahe aki a wòrdu kalkulá dor di Buro di Estadistika di Kòrsou (CBS). Aki ta referí na un porsentahe ku a keda kalkulá a base di enkuesta di “Nationale Rekening” kaminda a kue e promedio di porsentahe di tur sektornan;
3. Montante di supsidio pa gastunan operashonal fiho lo ta un mínimo di 30% (esaki ta basa riba e montante disponibel pa e areglo) .

Kalkulashon di e sosten

E fórmula pa e sosten ta enserá e (promedio di pèrdida di entrada) x (porsentahe definí pa gastunan operashonal fiho) x (porsentahe di supsidio ku Gobièrnu ta kubri). Pa e pago esaki ta bira:

[Entrada Q4 2019 – Entrada Q4 2020] x [0.32] x [0.30]

E montante mínimo di sosten na gastunan operashonal fiho ku lo wòrdu paga ta 750 florin te ku un montante máksimo di 150.000 florin.

Esaki lo ta un sosten insidental pa e di kuater kuartal di 2020.

Kon pa hasi un aplikashon

Por hasi aplikashon pa medio di e portal riba e wèpsait www.fondodisosten.org dor di yena e formulario di aplikashon.
Empresanan ku ya a yega di hasi aplikashon via di e areglo di NOW i/òf TVL lo risibí un mail ku link pa nan por apliká via di un formulario mas kompakto. Empresanan ku por a bini na remarke pa NOW i/òf TVL pero nunka a yega di apliká, mester yena un aplikashon mas amplio via di e portal kaminda lo mester yena tur detaye di e kompania i informashon di direktor statutorio.

Pa por hasi e aplikashon mester entrega kopia di deklarashon di impuesto di lunanan òktober, novèmber i desèmber di 2019 i tambe esnan di lunanan òktober, novèmber i desèmber di 2020. Banda di esaki empresanan ku ta kai bou di lista di sektornan di e areglo di NOW i/òf TVL pero ku no a hasi uso di e areglo menshoná. lo mester entrega deklarashon di ganashi di e añanan 2018 i 2019 huntu ku nan petishon. En general ta konta pa empresanan ku hasi petishon pa e areglo di gastunan operashonal fiho (TVL) ku nan mester a kumpli ku e pagonan hasi na Ontvanger òf ta dispone di un areglo di pago.

Por último pa por verifiká e identidat di e aplikante mester entrega un kopia di sédula, rijbewijs òf pasport i un potrèt di e aplikante ku su prueba di identifikashon den su man.

Ki periodo lo por apliká

E periodo pa por apliká ta habri djaluna 15 di mart 2021 pa 4 or atardi via e portal riba e wèpsait www.fondodisosten.org òf via di e link ku lo wòrdu manda via mail pa tur empresa ku ya a yega di hasi aplikashon pa NOW i/òf TVL.
Por yena e aplikashon te ku djaluna 22 di mart 2021 pa 4 or atardi. Lo no trata ningun aplikashon ku drenta despues ku e periodo sera. Pa eventual preguntanan por tuma kontakto ku e helpdesk di TVL via mail adrès: tvl@fondodisosten.org

Ki dia lo risibí pago

E intenshon ta pa hasi pago na tur empresa ku nan petishon ta kompletu, despues di un siman despues ku e periodo será. Pa empresanan nobo di kua nan petishon ta kompletu, esaki lo ta despues di 2 siman.
Si e aplikashon no ta dispone di tur e dokumentonan ku ta keda rekerí, e tratamentu di e aplikashon por dura mas largu. Den kaso ku esaki lo bai dura mas largu ku 2 siman, e aplikante lo keda informá di esaki via mail.

Desaprobashon i proseso di apelashon

Un komishon di konseho lo evaluá i husga tur petishon partikular i tambe petishonnan ku keda desaprobá pero e empresa no ta di akuerdo. Despues di evaluashon ku ta indiká si e petishon ta keda aprobá òf desaprobá, lo manda un mail ku resultado pa e aplikante.
De kaso ku e aplikante no ta di akuerdo ku e konseho di e komishon òf kisas no ta di akuerdo ku e montante ku ela risibí komo sosten, lo e por entregá un opheshon (bezwaar) via mail na: tvlbezwaar@fondodisosten.org kaminda e mester duna un splikashon detayá dikon e no ta di akuerdo.

Kobransa di montante risibí di mas pa e areglo di TVL

E montante di supsidio lo por wòrdu kobra bèk parsialmente òf kompletu si realisá ku a paga e empresa sin ku e ta’tin derechi riba esaki òf ku a paga e empresa un montante demasiado haltu di loke e mester a risibí. Pa ku kontrol final di e areglo e empresa mester warda tur informashon i komprobantenan pa ku su aplikashon di TLV pa 5 aña largu den su atministrashon. Si no por prueba ku e empresa tabata kumpli ku e kondishonnan pa ku e areglo esaki por resultá den kobransa bek.