Pa empresanan Mikro, Chikí òf Mediano (finansiamentu)

Fasilidat di krédito pa un biaha so, ku kondishonnan adaptá, pa kubri gastunan fiho di empresarionan ku negoshinan mikro, chikí òf mediano den sektornan gravemente afektá dor di COVID-19.

Kiko e sosten di Fiansa ta enserá?

Fiansa (serka Qredits òf Korpodeko) ku kondishonnan di pago adaptá riba término largu (ku un periodo di grasia di máksimo 12 luna) i (temporalmente) na un porsentahe di interes abou (2%). Si ta nesesario, e empresario lo risibí tambe guia i konseho pa asina sigurá ku e empresa por manehá e krédito debidamente i yuda reforsá e empresa su kapasidat pa na final kumpli ku su deber di paga e fiansa bèk.

Kua kompanianan ta bin na remarke pa e sosten aki?

Empresanan mikro, chikí i mediano, tantu den sektor di turismo (horeca i sektor di transporte) komo otro sektornan ku a ser afektá pa e efektonan di COVID-19 riba nos ekonomia.

Kua dokumentunan bo mester tin na man pa bo por yena e petishon?
  1. Sédula bálido (NO reibeweis, NO pasport, inkluso un pèrmit di estadia válido);
  2. Kopia di registrashon na Kámara di Komersio (no mas bieu ku tres (3) luna);
  3. Deklarashon di number di CRIB di kompania;
  4. Statüt (den kaso di un BV òf NV);
  5. Registro di akshonista (den kaso di un BV òf NV);
  6. Kopia di akuerdo di sosiedat kolektivo (den kaso di un Openbare Vennootschap);
  7. Kopia di pèrmit, manera pèrmit di establesimentu òf pèrmit di horeca, etc.
Kua dokumentu bo tin mester pa ora e instansia ku ta duna krédito tuma kontakto kubo?
  1. Kontrato di hür;
  2. Deklarashon bankario resien;
  3. Prueba di fiansanan eksistente (mester inkluí fechá i informashon tokante e montante di debe habrí);
  4. Deklarashon di SVB i/òf Ofisina di Impuesto i si ta aplikabel, tambe areglonan di pago será;
  5. Deklarashon di impuesto i Deklarashon di Entrada (2020);
  6. Sifranan anual mas resien;
  7. Oferta di invershonnan ku lo yuda ku e konsekuensianan di COVID-19.

E luna/aña ku mester entregá e dokumentonan menshoná bou di punto 2, 5 i 6, por varia pa kada instansia di krédito i lo wòrdu indiká na bo na su debido tempu.

Mi mester ta registrá na Kámara di Komersio i Ofisina di Impuesto?

Si, bo negoshi mester ta registrá na Kámara di Komersio i Ofisina di Impuesto por lo ménos promé ku 16 di òktober 2019.

Kiko un kompania mester kumpli kuné pa por bini na remarke?
  1. E kompania mester kumpli ku e definishon apliká pa Gobièrnu pa Empresanan Mikro, Chikí i Mediano:
    1. Mikro: 1 pa 4 empleado, entrada < ANG 0,5 mion;
    2. Chikí: 5 pa 10 empleado, entrada < ANG 0,5 mion;
    3. Mediano: 11 pa 50 empleado, entrada for di ANG 0,5 mion te ku ANG 5 mion;
  2. Dor di e medidanan ku Gobièrnu a tuma (por ehèmpel e regla di distansia sosial di 2 meter) bo kompania mester a para su aktividatnan operashonal parsialmente òf kompletamente (restorant, kápsalòn, barberia, salon di beyesa, ets.) i/òf bo kompania a ser afektá pa e efektonan di COVID-19 riba nos ekonomia. Mester entregá un deskripshon evidente di kon e kompania a wòrdu afektá;
  3. E kompania ta situá na Kòrsou;
  4. E doño/direktor mester ta bibá na Kòrsou i mester ta poseé di un sédula bálido òf un pèrmit di estadia válido si esaki ta aplikabel;
  5. E kompania mester ta registrá na Kámara di Komersio promé ku 16 di òktober 2019;
  6. E kompania mester por ofresé informashon finansiero ku ta demonstrá ku e kompania tin nesesidat di sosten debí na e medidanan imponé dor di COVID-19;
  7. E kompania a implementá ahustenan nesesario (kaminda esaki tabata posibel) na e prosesonan di operashon, debí na e implikashonnan kreá pa e pandemia COVID-19 (por ehèmpel restorant take-out i servisio di delivery) òf mester ta dispuesto pa hasi esaki;
  8. E fiansa ta prinsipalmente destiná pa pago di gastunan fiho di e empresa, inovashon òf mehoransa general di e empresa pa despues di COVID-19;
  9. E kompania mester ta finansieramente saludabel sufisiente promé ku e krísis di COVID-19 i mester por kumpli ku su obligashon di paga e fiansa bèk.
Yena formulario