Hende sin trabou (for di promé ku 15 di mart)

Ken ta bini na remarke pa e pago sosial pa defendé kurpa?

E pago sosial pa defendé kurpa ta destiná pa personanan ku ta desempleá promé ku e fecha 15 di Mart.

Kiko e pago sosial pa defendé kurpa ta enserá?

E pago ta den forma di un karchi di komestibel pa produktonan di promé nesesidat. E karchi di komestibel ta dependé di e konstelashon di e famía. E pago pa e persona desempleá ta pasa kada luna.

E periodo durante kua lo por risibí e pago sosial ta 1 luna.

Por ekstendé e periodo di kompensashon si esaki ta nesesario na momentu ku e situashon di emergensia, kousá pa COVID-19, sigui perdurá.

Personanan ku a pèrdè nan trabou i a bira desempleá promé ku 15 di Mart ta bini na remarke pa un karchi di komestibel pa:

• Soltero: ANG 300,- pa luna
• Pareha / Mama òf Tata soltero ku yu / Pareha ku yu: ANG 450,- pa luna

Kua dokumentu bo tin mester pa por yena e petishon?

1. Un sédula válido
2. Number di sédula
3. Un kuenta di banko riba bo nòmber
4. Adrès di bo banko
5. Bo number di CRIB personal (deseabel)
6. Nòmber i adrès di e organisashon kaminda bo tabata traha
7. Bo ùltimo 2 slipnan di salario (deseabel)
8. Bo karta di retiro (deseabel)
9. Diploma òf sertifikado (deseabel)
10. Curriculum Vitae (si bo tin esaki)
11. Bo mester ta inskribí komo buskadó di trabou na e Ministerio de Desaroyo Sosial, Labor i Bienestar (SOAW)

Kon e proseso di aplikashon pa pago sosial pa defendé kurpa pa persona desempleá lo kana?

1. Si bo ta un persona desempleá, bo ta yena e petishon, i si bo mester di yudansa, bo por risibí sosten pa medio di un chatline;
2. Na momentu ku esaki ta nesesario lo pidí bo pa bo ofresé mas informashon;
3. Bo ta risibí un informe den kua lo indiká si bo petishon ta aprobá òf desaprobá;
4. Na momentu ku bo petishon keda aprobá dor di Ministerio di Desaroyo Sosial, Labor i Bienestar (SOAW), lo bo risibí un karchi di komestibel.

Ki mi mester ta dispuesto pa hasi na momento ku mi ta risibí e pago sosial pa defendé kurpa?

E persona desempleá mester ta disponibel inmediatamente pa trabou pagá i/òf ta dispuesto na partisipá na rekapasitashon òf trayektonan di enseñansa. Na momentu ku esaki ta posibel, e persona desempleá mester kuminsa buska un trabou aktívamente. Mientras tantu e persone desempleá mester ta dispuesto na hasi trabou boluntario òf sigui enseñansa, i si ta nesesario ehersé esaki for di kas.

Ki ora mi ta risibí e karchi di komestibel?

Ounke bo a yena e aplikashon por kompletu, esaki aun no ta nifiká ku bo ta bini na remarke pa e karchi di komestibel. Ministerio di Desaroyo Sosial, Labor i Bienestar (SOAW) lo evaluá bo datonan i tuma un desishon riba e petishon. Ta posibel ku lo pidí bo pa ofresé mas informashon. SOAW lo purba na informá bo tokante e desishon final denter di 2 siman.