Pakete di sosten detayá
Kobradó di ònderstant
Kobradó di ònderstant por risibí un karchi di komestibel pa kinsena, banda di e ònderstant. Esaki segun e siguiente montantenan pa kategoria di kobradó di ònderstant:
- Personanan soltero: Ang. 75, – (Ang. 150,- pa luna);
- Pareha kasá sin yu/mayor soltero ku yu(nan): Ang. 150, – (Ang. 300,- pa luna);
- Pareha kasá ku yu(nan): Ang. 225,- (Ang. 450,- pa luna)
Hende sin trabou (for di promé ku 15 di mart)
Personanan ku a pèrdè trabou for di promé ku 15 di mart 2020 i tabata desempleá, ta bini na remarke pa un karchi di komestibel di:
- Soltero: Ang. 300,- pa luna;
- Pareha kasá/mayor soltero/pareha kasá ku yu: Ang. 450,-.
Hende ku a pèrdè trabou (for di 15 di mart)
Hendenan ku a haña retiro for di 15 di mart 2020 por bini na remarke pa un pago sosial di maksimalmente Ang. 1000,- pa luna.
Empresario Individual
Empresario Individual ku no tabatin trabou mas for di e fecha 30 di Mart 2020 por bini na remarke pa un kompensashon adishonal te ku e montante ANG 1.335,-.
Empresanan Mikro, Chikitu òf Mediano (finansiamentu)
Fasilidat di krédito pa un biaha so, ku kondishonnan adaptá, pa kubri gastunan fiho di empresarionan ku negoshinan mikro, chikitu òf mediano den sektornan gravemente afektá.
Empresanan (supsidio pa salario)
E kompensashon pa dunadó di trabou a baha riba petishon di Hulanda ku 20%, i awor ta igual na entre 28% i 72% di e suèldu total mensual, a base di bahada di entrada ku ta premirá (di por lo ménos 40%). Kondishon ta ku e dunadó di trabou ta mantené tur empleado den servisio na trabou i ta sigui paga nan, teniendo na kuenta eventual redukshon a base di aprobashon mutuo.
Empresanan (gastunan operashonal fiho)
Un sosten di e gastunan operashonal fiho lo hasi posibel pa e empresa por paga su kréditornan. Esaki lo evitá un efekto di dominó debí ku e empresa no por kumpli ku su debernan na otro empresanan manera entre otro seguro, banko etc. ku ta pone na su turno ku e empresanan (inkluso e sektor finansiero) ta haña nan ku problema di likides.